(१) ऐनको दफा १९ को
उपदफा (२) को खण्ड (ठ), (ड), (ढ), (ण) र (त) बमोजिम समितिमा मनोनयन भएका
सदस्यले समितिको पहिलो बैठकमा भाग लिनु भन्दा अघि प्राधिकरण तथा विशेष आर्थिक
क्षेत्रमा स्थापना भएको उद्योगमा आफ्नो निजी सरोकार वा स्वार्थ रहे नरहेको विषयका
देहायका विवरण खुलाई प्राधिकरणलाई लिखित जानकारी गराउनु पर्नेछ ः–
(क) प्राधिकरणसँग भएको कुनै ठेक्का पट्टा वा सार्वजनिक खरिदसँग
सम्बन्धित कुनै करारमा निज वा निजको एकासगोलको परिवारको
कुनै सदस्य पक्ष रहेको वा नरहेको र रहेको भए सोको विवरण,
(ख) विशेष आर्थिक क्षेत्रको स्थापना, सञ्चालन वा व्यवस्थापनमा हुने
लगानी, विशेष आर्थिक क्षेत्रको पूर्वाधार निर्माणमा हुने लगानी वा
विशेष आर्थिक क्षेत्रभित्र स्थापना भएको उद्योगमा निज वा निजको
एकासगोलको परिवारको कुनै सदस्यको हिस्सा वा शेयर रहे वा
नरहेको र रहेको भए सोको विवरण ।
(२) उपनियम (१) को प्रयोजनको लागि देहायको कुनै विषयमा छलफल वा
निर्णय गर्दा कुनै सदस्य वा निजको एकासगोलको परिवारका कुनै सदस्यको कुनै
किसिमको हक, हित, स्वार्थ वा सरोकार रहेमा त्यस्तो सदस्यको निजी स्वार्थ रहेको
मानिनेछ ः–
(क) नेपाल सरकार र निजी क्षेत्रको संयुक्त लगानी वा सहभागितामा वा
निजी क्षेत्रबाट विशेष आर्थिक क्षेत्रको स्थापना, सञ्चालन र
व्यवस्थापन तथा पूर्वाधार संरचनाको विकास सम्बन्धी विषय,
(ख) विशेष आर्थिक क्षेत्रमा उद्योग स्थापना तथा सञ्चालनको
अनुमतिपत्रसँग सम्बन्धित विषय,
(ग) विशेष आर्थिक क्षेत्रमा उद्योग स्थापना तथा सञ्चालनका लागि
प्राधिकरणसँग सम्झौता गर्ने विषय,
(घ) उद्योगको अनुगमन सम्बन्धी विषय,
(ङ) प्राधिकरणबाट निर्णय हुने कुनै विषयमा कुनै किसिमले निजी स्वार्थ
वा सरोकार रहेको अन्य कुनै पनि विषय ।
(३) उपनियम (१) बमोजिमको जानकारी प्राप्त भएपछि कार्यकारी निर्देशकले सो
विषयमा प्रमाणित गरी त्यसको अभिलेख राख्नु पर्नेछ ।