(१) परिषद्ले यो ऐन वा यस ऐन अन्तर्गत बनेको नियम बमोजिम आफूलाई प्राप्त अधिकार प्रयोग गर्न नसकेमा, अधिकारको दुरुपयोग गरेमा, प्राप्त अधिकारभन्दा बढी अधिकार प्रयोग गरेमा वा यो ऐन र यस ऐन अन्तर्गत बनेको नियम बमोजिम परिषद्ले पालना गर्नु पर्ने कर्तब्य पालना नगरेमा नेपाल सरकारले परिषद्‌ विघटन गर्न सक्नेछ ।
तर परिषद्‌ विघटन गर्नु अघि परिषद्लाई आफ्नो काम, कारबाही सुधार गर्न वा सच्याउने मौका दिनु पर्नेछ।
(२) उपदफा (१) बमोजिम परिषद्‌ विघटन भएपछि परिषद्को कोष र अन्य सम्पत्ति नेपाल सरकारले आफ्नै जिम्मामा राखी अर्को परिषद्‌ गठन नभएसम्म यो ऐन र यस ऐन अन्तर्गत बनेको नियम बमोजिम परिषद्ले गर्नु पर्ने सबै काम कारवाही आफैँले गर्न वा कुनै समिति गठन गरी सोही समितिबाट गराउन सक्नेछ ।
(३) उपदफा (१) बमोजिम परिषद्‌ विघटन भएको छ महिनाभित्र नेपाल सरकारले दफा ५ को उपदफा (१) बमोजिम अर्को परिषद्‌ गठन गर्नु पर्नेछ ।
(४) उपदफा (३) बमोजिम अर्को परिषद्‌ गठन भएपछि उपदफा (२) बमोजिम नेपाल सरकारले आफ्नो जिम्मामा राखेको कोष र सम्पत्ति सो परिषद्लाई हस्तान्तरण गर्नेछ।