विषय वा प्रसंगले अर्को अर्थ नलागेमा यस नियमावलीमा :–

(क) “ऐन” भन्नाले उपभोक्ता संरक्षण ऐन, २०५४ सम्झनु पर्छ ।

(ख) “मन्त्रालय” भन्नाले नेपाल सरकार, आपूर्ति मन्त्रालय सम्झनु पर्छ ।

(ग) “कार्यालय” भन्नाले नेपाल सरकार, आपूर्ति मन्त्रालय निरीक्षण अधिकृतको कार्यालय सम्झनु पर्छ ।

(घ) “उजुरी” भन्नाले देहायका कुनै विषयका सम्बन्धमा उजुरवालाले लिखित रूपमा गरेको दावी सम्झनु पर्छ :–

(१) अनुचित व्यापारिक क्रियाकलापसँग सम्बन्धित कुनै काम कारबाहीमा कुनै व्यापारी संलग्न रहेको ।

(२) उजुरवालाले खरिद गरेको वा खरिद गर्न मञ्जुर गरेको कुनै उपभोग्य वस्तु कमसल भएको ।

(३) उजुरवालाले प्राप्त गरेको वा प्राप्त गर्न मञ्जुर गरेको सेवामा कुनै किसिमको त्रुटी वा कमी रहेको ।

(४) निर्धारित मूल्य भन्दा बढी मूल्य लिई उपभोग्य वस्तु वा सेवा बिक्री वितरण वा प्रदान गरेको वा गर्ने नियत राखेको ।

(५) उपभोक्ताको जीउ, ज्यान, सम्पत्तिमा खतरा वा जोखिम पुग्ने वा पुग्न सक्ने किसिमका उपभोग्य वस्तु बिक्री वितरण गरेको वा गर्ने नियत राखेको ।

(६) ऐन, यस नियमावलीमा वा अन्य प्रचलित कानूनको विपरित उपभोक्ताको हक हितमा प्रतिकूल असर पर्ने किसिमको कुनै काम कारबाहीमा कुनै व्यक्ति वा संस्थाको संलग्नता रहेको ।

(ङ) “उजुरवाला” भन्नाले उजुरी गर्ने देहायका कुनै व्यक्ति वा संस्था सम्झनु पर्छ :–

(१) उपभोक्ता,

(२) उपभोक्ता संस्था,

(३) नेपाल सरकार वा नेपाल सरकारको पूर्ण वा आंशिक स्वामित्व भएको कुनै संस्था।

(४) एकै प्रकृतिका सामूहिक हितसँग सम्बन्धित एक वा एक भन्दा बढी उपभोक्ता ।

(च) “सम्बन्धित व्यक्ति” भन्नाले उपभोग्य वस्तु उत्पादन गर्ने, बिक्री वितरण गर्ने, आयात गर्ने व्यक्ति सम्झनु पर्छ र सो शब्दले त्यस्ता  व्यक्तिहरूको अधिकृत प्रतिनिधिलाई समेत जनाउँछ ।